Филм | Замини Баросо (Бароса); хонаи Марям (с) ва зодгоҳи Исои Масеҳ (а)
Ба гузориши ИҚНО ба нақл аз торнамои Масҷиди ҷомеи Баросо, ин масҷид дар ҳошияи Бағдод, фаротар аз як макони муқаддаси шиъа, гувоҳи зинда бар ҳамоиши амиқи таълимоти ислом ва масеҳият дар садаҳои нахустини исломӣ аст. Бар асоси ривоятҳои муътабари таърихӣ аз Шайх Садуқ ва Шайх Тӯсӣ, ин масҷид дар маҳалле бунёд шудааст, ки Имом Алӣ (а) пас аз набард бо ховарич, ба нишонаи эҳтиром ба мақоми қудсии он, дар он ҷо намоз гузориданд. Дар ҳамин макон, як роҳиби масеҳӣ ба Имом (а) хабар дод, ки ин замин ҳамон хонаи Марям (с) ва замини Исои Масеҳ (а) аст, ки дар китобҳои осмонӣ ба он башорат дода шуда буд; маконе, ки Имом худ бо ошкор сохтани чашмаи Марям (с) бар қудсияти он муҳр гузоштанд.
Масҷиди Баросо дар наздикии Бағдод ҳамеша ҳамчун яке аз марказҳои асосии маънавӣ дар Ироқ шинохта шудааст. Аҳамияти ин масҷид на танҳо ба сабаби ҳузури таърихии лашкари садҳазорнафараи Амирулмуъминин Алӣ (а) ва намози эшон ҳангоми бозгашт аз ҷанги ховарич аст, балки ба далели иртиботи амиқи он бо решаҳои таърихии ҳазрати Исои Масеҳ (а) ва ҳазрати Марям (с) низ шуҳрат дорад.
Тасдиқи илоҳӣ бар қудсияти замин
Тибқи ривояте, ки санадҳои он ба Ҷобир ибни Абдуллоҳи Ансорӣ мерасад, пас аз адои намози гурӯҳӣ дар Баросо, ки қаблан дайр (савмаъа) будааст, як роҳиби масеҳӣ аз савмаъаи худ поён омад ва бо дидани шукӯҳи фармондеҳии лашкар, аз ҳувияти Имом (а) суол кард. Роҳиби масеҳӣ бо таъкид бар ёфтаҳои худ дар китобҳои осмонӣ эълон намуд, ки ин макон ҷойгоҳи вижае дорад ва ӯ савмаъаи худро ба эҳтироми ҳамин мақом бунёд кардааст.
Роҳиб дар идома ишора кард, ки ин макон — ҳамон Баросо — «хонаи Марям (с) ва замини Исои Масеҳ (а)» аст, ки паёмбарони пешин ба фуруд омадани васии Паёмбар (с) дар он башорат дода буданд.
Дар пайи ин гуфтугӯ, Имом Алӣ (а) бо зарба задан ба замин, чашмаи Марям (с)-ро ошкор сохтанд ва дастур доданд маконеро то умқи ҳабдаҳ зироъ канданд, то санги сафеде падидор гардад.
Имом (а) таъкид карданд, ки ҳазрати Марям (с) дар ҳамон нуқта ҳазрати Исои Масеҳ (а)-ро бар замин гузошта ва намоз хондаанд. Сипас худи Имом (а) низ бар рӯи ҳамон санг намоз гузориданд ва чиҳил рӯз дар он ҷо иқомати комил доштанд.
Меъмории масҷид ва фаъолиятҳои фарҳангӣ
Масҷиди Баросо, ки бар пояи аҳамияти таърихии худ бунёд ёфтааст, борҳо мавриди тармим қарор гирифта ва охирин бозсозиҳо масоҳати онро ба тақрибан чор ҳазор метри мураббаъ расонидаанд. Ин маҷмуа бо ду манораи кунунӣ ва сақфи чӯбини аз чӯби сож (сак), намунае аз ҳамоҳангии ҳунари меъмории исломӣ ва ҳифзи асолати таърихӣ мебошад.
Яке аз муҳимтарин фаъолиятҳои ин масҷид баргузории муносибатҳои динӣ, ҷашнҳои мавлуд ва маросими азодории аиммаи атҳор (алайҳимуссалом) аст. Ҳамчунин маросими нимаи Шаъбон, Тосӯо ва Ошӯрои Ҳусайнӣ, маросими эҳёи моҳи мубораки Рамазон ва пазироӣ аз мокибҳои Арбаъини Ҳусайнӣ низ дар ин масҷид баргузор мегарданд.
4324838
